آخرین مطالب:  

من فمینیست دئییلم ؛ آزربایجان قادینی یام – شریفه جعفری

اؤیرنجی سسی: من فمینیست دئییلم ؛

آزربایجان قادینی یام ؛

آت یاریشلاریندا قازانمیشلار آتالاریملا- آنالاریم سئوگی لرینی؛

آتام خانیم دئمیش ، خاتونوم دئمیش ، حایات یولداشیم دئمیش آناما ، جانلی جانلی گؤمولدنده قیز اوشاقلارینی عرب کیشی لری ،

دونن لره قده ر هئچه ساییلاندا اینگیل تره قادینلاری و اینجیل کیتابینا یاساق اولاندا ال سورمه لری ،

تاریخ یارادیردی اوغوز قادینلاری ساواش و سئوگی میدانلاریندا ، برابرلیک قانونلارینی یاشاییردیلار کاغازلارا یازیلمامیش، آزربایجان تاریخی نین هر ورقینده بیر قادین حیکایه سینین صلابتی واردیر شبهه سیز ،

من فمینیست دئییلم ، آزربایجان قادینی یام ،

اسکندری آیاقلارینا چؤکدورموش نوشابه خانیم دیر غروروم ، تومروس آنادیراؤرنه ییم ،

آغا بئییم آغادیر ، تهران پادشاهلیغینی بیر وطن خاری بولبولیله دئیشمه ین شاعیره ، زینب پاشا دیر ، تئللی زری دیر…

نئیمه گرکیر فانتزی اویونلارلا قادین حاققی مودافیعه چی لرینین قیلیغینا گیرمک ؟!پز وئرمک ده حتی ،

منده ازیلمیشم یاشادیغیم بویدا ، اهانت لر گؤرموشم ساچلاریم سانی ، طوفان لار ؛ قاسیرقالار آشیرمیشام قادینلیق مظلومیتیمدن ،

ییخیلما دئمیشم اؤزومه میلیونلار کره ، حیکایه دیر بویدان باشا یاشادیغیم حایات ،

پارام پارچا ائدیبلر اوره ییمی ، ارکک لر هئچ هله ، قادین فیکیرداشلاریمین بطنینده کی ارککلیک گؤونلی یی ، نلره محکوم اولموشام ظنی لریجه ، نه چینیمده کی آغیرلیغی ، نه اوره ییمده کی آتشی گؤردولر ، عکسینه نلر دوشوندولر ، نلر ، نلر ؟؟؟

تیتره مه دئدیم آیاق لاریما ، بئزمه دئدیم اراده مه دوغرودور یولون ، سئوگی یه ایناندیم، اینانینجا ازیلدیم ، و بو منیم حیکایم دئییل کی ساده جه میلیونلار قادینین حیکایه سیدیر بو گون آزربایجان جغرافیاسیندا،

اؤلدوم ده ، آزربایجان قادینی قالماق ایسته دیم ،سئومه یی دئیشدیرمه دیم نفرتله ، آزربایجان پینارلارینین سویو آخدیقیندان دامارلاریمدا ، دامارلاریمداکی سئوگی قیویلجیقلاری یاشاتدی حایاتیمی ،

کؤراوغلوسوز نیگار یارانماز منیم داستانلاریمدا ، هجرسیز قاچاق نبی ،

فمنیست لیک مدرن لشمک ساییلمیر دوشونجه لریمده ، مدرن لشمک زامان گلیشمه سیدیر و من وجودوملا مدرن لشدیریره م دوشونجه لریمی ،دونیا گلیشمه سیله گلیشمک ، مدرن لشمک ایسته ییرم، آزقین لیقلا دئییل.

آزربایجان قادینی یام ، نه آزماق ایسته رم نه آزدیرماق ، حاق سیزلیغا قارشی یام ، نامردچیلیه دوشمان آما، .

واختیمی عاقیل شاشیردان عینادکارلیقل لارا خرج له مه رم ده ،کاییناتین طبیعتینی دئیشدیرمک شعارلاری وئرمک الیمدن ده گلمز عاقلیمدان دا.

قادین قادین یارانمیش ، ارکک ارکک ، دویغوسال و فیزیک سل فرق لرله آما برابر حقوق لارلا ، هر ایکی سی انسان یارادیلدیغیندان /.

فمینیستم ، بو حرکتین بیر یوللارینا قده ر نرمال فورمولار چرچیوه سینده قازاندیغی حاقلارین مینتداری یام دا ، باش ائییرم ده قادین حاقلارینی دیریلدن مباریزلرین قارشیسیندا ، دنیانین هر یئرینده ،

آما بو گون بو عنواندا آزربایجان قادینی نین حاققینی مدافیعه ائتمک کیچیلتمک دیر اونو ، جاهیل و فاحیشه بئین لی کیشی لرین اویونجاغی ائتمک دیر اصلینده /.

بو گون کی فمنیست معیارلاریندا و بازارلاریندا گئدن پلانلار ، سورون لار و ایستک لر مطلق و مطلق بیر آزربایجان جامعه سینده یاشایان آزربایجان قادینی نین سورونو و ایسته یی دئییل آنجاق بو ایستک آن آزی بو گونکو آزربایجاندا یوخ بلکه اوروپا وآمریکا و بیر سیرا باشقا اولکه لرین سورونودور ،

بیز میللتیمیزین ، قادین لاریمیزین دردینین نه اولدوغونو آنلامادان اونلاری آتیب توتماق و بئله فعالیت لرله زامانیمیزی ، پتانسیل لریمیزی قویماق لا و بوتون بونلاری دا میللی حرکته یاپیشدیرماقلا ، میللی حرکتین یوللارینی آزدیر میریق می ؟

بو گون تکرار تکرار اینجی ین و ازیلن بیر آذربایجان قادینی نا دوغرو یولو گؤسترمک دن اونو چاشدیرماق اونون و میللی حرکتین هانسی خیرینی الده ائده بیله جک کی ؟

اوروپا فمنیست هاواسیندا ، گونئی آذربایجان قادینی نی مدافیعه ائتمک ، بوش بوشونا زامان خرج له مکدیر ساده جه . و یول آزدیرماق دیر دا ..

قدیم کی لر دئمیش کن ، “نفسین ایستی یئردن چیخیر ” قاداسی.

آزربایجان تاریخینده هئچ حرکت ، هئچ اوغور ساده جه کیشی لرله باش وئرمه میش ،بلکه هر زامان برابر ساواش میشلار و برابر قازانمیشلار /.

کیشی سیز حایات ، قادین قادین دوغولمور سونرادان قادین اولور . و و وبو دور بو گون کی فمنیستی دوشونجه لر !!!

من بو گون آزربایجان قادین حاققی مدافیعه چی اولماغیما اؤزومو یابانچی لار معیارلارینا و قیلیغینا سالماغی گرک گؤرمورم ، بو گون آزربایجان قادینی نی تمثیل ائتمه ین عنوانلا میدانا چیخماق و مدرن اولماق و دنیا سوییه سینده مبارزه ده آپارماق ایسته میرم ،

بدنیمین جینسل نقطه لرینی بزه ییب کیشی لردن حاققیمی طلب ائتمک ایسته مه رم ده، و کسین لیکله بو گون آزربایجان قادینی دا بوفورمادا حاققینی قازانماق ایسته میر.

جیسارت سیزلییمدن دئییل ، گئری دوشونجه لییمدن ده دئییل ، دین چی ، مین چی دئییلم ده آصلا. اصالتیمدن دیر ، من اؤزومو گلیشدیرمکله ، علمیمی یوکسلتمکله ، ییخیلماماقلا ، آنجاق عینادلا یوخ ، منطق له دورومو دئیشدیرمه یه و اونو برابرلیه یونلتمه یی شجاعتیمدن بیلیرم ، و قیزلاریمیزی ، قادینلاریمیزی دا شاشیرتماقدان نرمال تعلیم لرله گوج لندیرمک ایسته ییرم /

بو گون کی آزربایجان قادینی آزادلیق ، سئوگی ، سایقی ، صداقت برابرلیک ، زوراکیلیغا باش ایمه مک ، غرورلا یاشاماق دیله ییر یاشادیغی جامعه دن /.

اسلامی و غیر اسلامی یالنیش دوشونجه لرین حاکیمیتینه سون قویولسون ایسته ییر بئئین لرده ، خیانت لردن پارام پارچادیر اوره یی ، قول قانادلاری ازیلیب اهانت لردن ،

بو گون آزربایجان کیشی سی ، اؤزل لیکله میللی حرکت فعالی اویرنمه لی ، و ائولادینا اویرتمه لی کی قادین کیشی بیردیر حقوق باخیمیندان . یاشام دا ، ایش ده ، حایات لذت لریندن فایدالانماقدا ، مبارزه ده ، مسابقه ده ، ناموس ساییلان دورومدا ، بیر قیزلا اوغلان سئویشیب آیریلینجا قادین روسپی و کیشی کیشی لیک مقامینا دوشمه مکده …

بو گون آزربایجان قادینی ، توپراق ساواشچی سی ، دیل ساواشچی سی ، کولتور ساواشچی لیغین یانیندا درین و چیتین بیر ساواشدا آپاریر کیشی ساواشچی لارینین یانیندا ، مین ایللیک یالنیش و ازیجی و آشاغیلاما دوشونجه لرینی دئیشدیرمک ساواشی دیر، تحمل ائتمک دیر یانیندا یوروین بعضی ارکک لرین یالنیش دوشونجه لرینی /.

و آیریجا ، بو گون آزربایجان قادینی نین سورنو ساده جه ارکک لرین تحقیری و ظولمو دئییل بلکه ،ارکک بئیین لی قادین لارین بطنینده کی اوشاقلارین دوغولماسیدیر / مثلا من بیر قادین حیاتیمی نابود مرحله سینده گؤرونجه اؤزومو قورتارماق جیسارتی تاپارسام ، خایین ، وفاسیز ، ظالیم ساییلیرام قادین تانیشلاریمین یانیندا و اریم کئفیندن بیلدیی نی ائدرسه نرمال بیر عمل کیمی قبول ائدیلرو آه چکن ده تاپیلمیر ازیلمیش قادینین پئشیندن ،

بو گون آزربایجان قادینی نی مدافیعه ائدن بونلارلا مبارزه ائتمه لی ، جاهیل و فاحیشه بئیین لرله ساواش مالی ، آنجاق بیر گون یاشام و اؤزگورلوک دوشونجه سی اوروپا درجه سینه یئتیشرسه او زامان بئله فعالیت لره زامان صرف ائله مک نرمال دئمک دیر ،

آنجاق من فمینسیت دئییلم ، آزربایجان قادینی یام ، اینجیمیره م ده بلوک ائله دییندن منی دونن کی دوستوم بو گون کی فمینیست باجیم ،

من ساده جه سنین کیمی دوشونه بیلمیره م نفسیم ایستی یئردن یوخ ، قاراداغ دوزلرینده یاتاقلارینی نفس لریله هاولیا هاولیا قیزیشدیران ائولرین باجاسیندان چیخیر /.

و من فمینست دئیلم ، آزربایجان قادینی یام /.

شریفه جعفری

هانوفر-آلمان

اشتراک گذاری

دریافت جایزه علمی یونسکو توسط بانوی آزربایجانی

اعطای جایزه “آزربایجان بِست اِواردز ۲۰۱۶” به پریسا ارسلانی + تصاویر

مطالب مرتبط

دیدگاه خود را ثبت کنید.

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

Time limit is exhausted. Please reload CAPTCHA.